Kapałka

Z mjenom wšak njemóžu zapisać něhdyšeho wobsedźerja małeje kamjentneje kapałki z boka wjeski k ranju, jara derje schowanu w lišćowym haju. Dawny dobroćel je wěsće hižo dołho na prawdźe Božej  a chroniku kapałki wza sobu do rowa. Myslu, zo hižo přez třista lět tu spěwaja ptački napřemo swj. Marce wjesołe spěwčki a pokěrluški. Cuzy zemski dróhowar kapałku Lourdskeje Maćerje Božeje w Miłoćicach snano jenož připadnje nadeńdźe. Na małym, murjowanym wołtarku, wodźetym z běłym rubom, postrowimy mału, někak 40 cm wysoku, derje zdźeržanu postawu. Horni dźěl durčkow je škleńčany, durje so z lochkej prócu wočinja a z kłapacej wutrobu zastupiš před chudy zemski trón madony. Zabyty, wopušćeny pak nihdy njeje. Tři razy widźu cyle čerstwe brězowe hałužki mjez małymi módrymi kwětkami. Jednore drje su, ale z kajkej lubosću a česćownosću poskićene wot njeznatej dobroćelki ze wsy. Kwětki nošo chodźi tam ze swojimaj wnučkomaj a přeco wuspěwaja tam před swj. Marku: Strowa sy Marija...

Městno wokoło kapałki je tróšku powyšene a cyle ze zelenymi dźiwimi fijałkami wobrosćene. Tež tu zakćěwaja prěnje małe módre kwětki. Njebudźe hižo dołho trać, a wokoło małeje kapałki w Miłoćicach budźe natura wupřestrěć módry a zeleny přestrěnc.

Wjesnjan 84-lětny Bukec dźěd so dopomina, kak su wokoło kapałki sej jako šulske hólcy hrajkali a so łójili. Njeznaje kapałku hinašu, hač ju dźensa widźimy. Bjez dwěla je jara stara. Městnu, hdźež steji, prajachu: pola kapałki na horje - Kapellenberg. Zdawna słušeše "Kapellenberg" ke kuble Pětra Šołty. Bě to wjesna korčma, kotraž sama piwo warješe. Pětr wosta nježenjenc a njeměješe potomnikow. Přewostaji kubło po přećelstwje wěstemu Albertej Delenčcy, kotryž dźěše w njewěstych hospodarskich lětach 1940 - 50 do zapada. Zemrě w lěće 1973. Kapellenberg kupi Bernhard Schwarz čo. 25. Tuta swójba so hač dotal wo kapałku stara.         

žórło: Mikławš Kokla ze Sernjan, 1967