Mětkec/Šěrcec/Kowarjec swjaty křiž

Před zastarskimi wjelbowanymi wrotami hospodarstwa Jurja Šěrca čo. 22 postrowimy barbjeny swjaty křiž. Na wuměłskim železnym křižu steji pod Křižowanym  swjata Marija. Napis taflički je němski, tola je dobry: "Es ist vollbracht. Vater in deine Hände empfehle ich meinen Geist." Dypanej pismikaj M. M. (Michał Mětka) 1882, so tak zrozumitaj: Staršej Šěrcec maćerje rodź. Wagnerec z Wrócsławja (Breslau)  přićahnyštaj do prěnjeje swětoweje wójny a so tu zasydlištaj. Pomnik prjedownikow 1938 ponowichu. Chroble rosće tu mócna dalija (georgina) do wysoka. Čerwjene pupki so pukaja, zo bychu wukćěłi ke krasnym róžam k nohomaj Jězusa.

žórło: Mikławš Kokla ze Sernjan, "Swjate křiže w serbskim kraju", wozjewjene w Katolskim Posole 1968 

Zapisk do pomnikoškitneje lisćiny 2001

• stołp: kowany křiž z róžowcowej maćerju božej na granitnym podstawku, mać boža a korpus stej pozłoćanej
• datěrowanje: 1882

přełožk z němčiny: radyserb 

Wudospołnjenje z lěta 2008 

Młoda Kowarjec swójba je ležownosć 1986 kupiła wot mějićela Hansa Šnajdera, kotryž bě sotrowc Šěrcoweje, potajkim rodźeneje Šnajderec a pochadźeše z tuteho dwora. Kamjentny swjaty křiž da swójba 1992 ponowić (M.K.1992), barbu z kamjenja dospołnje wotstroni a na tafličku napisa hrónčko: "Chwalmy tebje stari, młodźi, sławmy krala wěčnosće!" Poswjećeny bu křiž na kermušu přez knjeza fararja Delana, bratra Kowarjoweje. Wo wupyšenje stara so Kowarjec wowka. Před tutym křižom wotměwaja so tydźensce mejske nyšporki wjesnjanow.