07.10.2023
Dźěłanska akcija: nowe hrajkanišćo
Sobotu dopołdnja zetka so tójšto młódšich a staršich Miłočenjow, zo bychu při twarjenju hrajkanišća pomhali. Kerki so zaso přitřihachu, pěsk so wokoło suwadła nawozy a zdónki so zhładźichu.

Měsac róžowca
Kaž z wašnjom modli so kóždu póndźelu 18:00 hodź. w starym konsumje róžowc.

04.06.2023
Swójby zaso kolesuja
Słónco smali, žana mróčałka na njebju...
Dypkołnje po připołdnišim spinku zhromadźichu so někak 35 młódšich a staršich Miłočenjow při starym busowym zastanišću srjedź wsy. Z kolesom, słónčnymi nawočimi a kłobukom čakachu napjaći, dokal puć wjedźe. Po witanju a poslednich pokiwow (akku e-bikow měł so hasnyć!), přeradźi Tadej Wjesela turu a cil. Přez Lindach a Njebjelčicy wjedźeše puć směr Němske Pazlicy. Při pěskowym młynje wotboći kolona a jědźeše runje won směr pastwy, hdźež so bisony pasychu.
Kofej, tykanc, wafle a brěčki běchu hižo spřihotowane, tak zo móžeše so kóždy najprjedy raz rjenje w chłódku wotčerstwić. Tež bisony buchu wćipni a přiběžachu cyle blisko k płoće. Nětko móžachu so 8 bisony z 3 ćelatami cyle blisko wobhladować. Po dobrej hodźince a prózdnych talerjow, poda so kolesowanska šwita přez Pěskečanski lěs směr Serbske Pazlicy. Přez pólne šćežki a nimo žaby, bě doskónčny cil pola Wjeselic w Miłoćicach docpěty.
Přitulne a wjesołe popołdnjo skónči při winje a piwku z dobrym praženym a solotjemi.

17.05.2023
Mejemjetanje
"Wona padnje..."
Tak zaklinči, kaž z wašnjom, dźeń do Božeho spěća nawječor w Miłoćicach.
Dźěći a młodostni w starobje 3 do 20 lět rejowaše z cyłkownje 22 porami wokoło meje. Hač na štyri holcy, su so wšitke serbsku katólsku drastu zwoblekli.
Pola dźěći wudoby sebi Lukas Metzger mejski wjeršk a wuzwoli sebi Jozefinu Cyžec jako swoju kralownu.
Pola młodostnych nawjedowaše Jan Bobka ze swojej kralownu Francisku Bobkec swjedźenski ćah.
Z konjom na čole ćehnjechu Miłočenjo a tójšto hosći spěwajo přez wjes na žurlu, hdźež so lóštne mejske reje z Frankom Wjeselu přizamknychu.

Mejske nyšpory
Kóždy štwórtk we 18.00 hodź. zetka so mnoho Miłočanow prjedy Kowarjec Swjateho křiža, zo bychu Mejski nyšpor woswjećili.

01.05.2023
Mjatwička, tomaty, kolrabi a co...
Swójba Budarjec powita popołdnju wšitkich přećelow zahrodki a zajimołwanych na lětušu wuměnu rostlinow. Při wjesołej rozmołwje młodych a staršich so popołdnjo spěšnje ke kóncej chilaše a wšitcy so zaso z połnymaj rukomaj a dosć dźěła w zahrodźe domoj nawróćichu.

30.04.2023
Meja so staji a chodojta so wotpali
Z dypkom 17:00 hodź. přichwatachu zaso ze wšěch róžkow wjesnjenjo, zo bychu ze swójskej mocu a bjez techniki, meju stajili a to lětsa zaso na starodawnym městnje při haće.
Jako so wjeršk wysoko nad Miłoćicami w powětře poćumpa, zaspěwa so mócnje "Nět meja nazeleni".
Po tym zapalichu wohnjowi wobornicy hromadu hałuzow z krasnej paslenej chodojtu. Pražena kołbaska a rybičkowa całta njejstaj pobrachowałoj.

28.04.2023
Cyła šwita Miłoćenjow zetka so pjatk popołdnju při wohnjowej woborje, zo bychu ranku za meju nawili.
Pilnych pomocnikow dla běchu spěšnje hotowi a kołbaska z piwkom a winkom derje zeswodźeše.

27.04.2023
Kaž kóžde lěto poda so zaso mała horstka muži a młodostnych do lěsa, zo bychu hałužki za ranku meje wobstarali.

09.04.2023
Přejemy wšitkim sobustawam towarstwa žohnowane jutry.
20 křižerjo z Miłoćic a 10 křižerjo z Wěteńcy poda so jutrownu njedźelu připołdnju do Pančic-Kukowa, hdźež z tamnišim procesionom zrowastanjenje Jězu Chrysta wozjewjachu.

01.04.2023
Miłoćicy hotuje so na jutry
Tež tute lěto poda so zaso někak 50 małych a wulkich pomocnikow sobotu dopołdnja na nohi, zo bychu sebi wjesku k nalěću rjenje wurjedźili.
Tak wuswobodźichu někotři stare busowe zastanišćo wot pałčinow a wurjedźichu wokna. Druzy wumjećechu hrajkanišćo a kerćizny při haće so přitřihachu. W lěsu při žabje so lišćo zhraba a informaciska tafla dósta nowu barbu. Na kóncu so hišće někotre dźěry wurjebachu, hdźež so granitowe kamjenje za planowane ławki zasadźichu.
Prjed hač wšitcy zaso domoj chwatachu, dawaše pola Wjeselic na dworje hišće mały přikusk.
Wutrobny dźak wšěm pomocnikam!

27.02.2023
Protyka je so aktualizowała.
Nalětne rjedźenje wotměje so 01.04.2023 wot 8:30 hodź. a swójbny wulět z kolesom přesunje so na 04.06.2023.

26.02.2023
11 čłonow Miłočan žaby wobhladachu sebi w Budyšinje dźiwadłowe předstajenje "Hrěšna wjes abo zabyty čert".

21.02.2023
Helau, helau!
Póstnisku wutoru klinkaše při durjach a črjódka wjesołych małych a wulkich rjanych předrasćenych norow spěwaše wjesele "Heja, dźěći pójće camprować!". Rjany to nawožk, kotryž budźemy klětu rady zaso wospjetować.